Intii lagu guda jiray Meertada 25-aad ee Shir Madaxeedka caadiga ah ee Hoggaamiyeyaasha Ururka Bulshada Bariga Afrika, kaas oo qabsoomay 7-dii bishan Maarso, waxaa si rasmi ah loo dhaariyey Garsoore Cabdiwaaxid Cabdullaahi Warsame, oo noqday xubin ka tirsan Garsoorka Maxkamadda Caddaaladda Ururka Bariga Afrika, halkaas oo uu Soomaaliya ku matali doono.
Waxbarshada iyo Khibradda Garsoore Cabdiwaaxid
Garsoore Cabdiwaaxid waa aqooyahan bartay cilmiga sharciga heerarkiisa kala duwan. Wuxuu sannadkii 1984 ka qalin-jabiyey Kulliyadda Qaanuunka ee JUS, kaddibna wuxuu noqday Xeer-ilaaliye ka tirsan Maxkamadda Gobolka Banaadir.
Sannadkii 1986, waxaa loo magacaabay Maareeyaha Guud ee Mashruuca Horumarinta Beeraha ee Gobollada Waqooyi.
Markii dowladdii kacaanku hoggaaminayay ee Soomaaliya burburtay, waxaa uu kamid noqday aqoonyahankii degay dalka Maraykanka. Halkaas oo uu shahaadada sare ee Qaanuunka (LLM) ka qaatay Moritz College of Law ee Jaamacadda Ohio State. Sannadkii 2002 ayuu shaqo ka bilaabay Xafiiska Xeer-ilaalinta ee Degmada Columbus, shaqadaas oo uu hayey ilaa sannadkii 2025.
Garsoore Cabdiwaaxid ayaa ku biiraya aqoonyahanka Soomaaliyeed ee kaalmaha kala duwan ee aqoonta ugu adeegaya dalkooda. Kasokow aqoonta sharciga waa qoraa si joogto ah uga faallooda arrimaha Soomaaliya, wuxuuna ka mid yahay aqoonyahannadii raadiyay xilka Ra’iisul Wasaaraha dalka.
Ku biirista Maxkamadda Bulshada Afrika ayaa ka dhigan inay Soomaaliya hore ugu socoto inay dhammaystirto kamid ahaanshaheeda Ururka Bulshada Bariga Afrika, inkasta oo ay weli caqabad kala kulmayso dhaarinta Xildhibaanada, sabab la xiriirta bixin la’aan qaaraanka maaliyadeed ee Soomaaliya laga rabo.