Xubno ka tirsan Aqalka Wakiillada ee dalka Mareykanka, oo uu hormuud u yahay mudane Ronny Jackson oo laga soo doorto gobolka Texas, ayaa soo hordhigay mashruuc-sharciyeed cinwaankiisu yahay “Sharciga Ilaalinta Canshuurbixiyaha iyo Mas’uuliyadda Soomaaliya ee 2026” (H.R. 8334). Hindisahan ayaa xambaarsan qodobbo xasaasi ah oo saameyn weyn ku yeelan kara xiriirka dhaqaale iyo midka diblomaasiyadeed ee u dhexeeya labada dal. Nuxurka sharcigan waxa uu u kala baxa dhowr qaybood oo muhiim ah:
1. Joojinta Kaalmada iyo Dhaqaalaha
Sharcigu wuxuu dalbanayaa in gabi ahaanba la hakiyo gargaarka tooska ah ee Mareykanka siiyo Soomaaliya (Bilateral) iyo midka uu u mariyo hay’adaha caalamiga ah (Multilateral), ilaa laga xaqiijinayo in lacagahaas aan si khaldan loo isticmaalin. Waxaa sidoo kale la soo jeediyay in Madaxweynaha Mareykanka uu amro joojinta ama xannibaadda xawaaladaha (remittances) laga soo diro Mareykanka ee loo diro Soomaaliya, ilaa laga hubiyo:
In lacagaha la dirayo aysan ahayn kuwo laga soo qaatay barnaamijyada cayrta ama gargaarka ee Mareykanka dhexdiisa.
In lacagahaas aysan gacanta u galin mas’uuliyiin ka tirsan dawladda Soomaaliya ama kooxaha argagixisada.
2. Baaritaanka Musuqmaasuqa iyo Mas’uuliyadda
Sharcigu wuxuu amar ku bixinayaa in baaritaan dhab ah lagu sameeyo dhammaan xaaladaha laga shakisan yahay ee la xiriira lunsasho ama wax-is-dabamarin lagu sameeyay gargaarkii Mareykanka ee Soomaaliya, gaar ahaan falalka ay ku lug leeyihiin mas’uuliyiin dawladeed. Xoghayaha Arrimaha Dibadda ayaa laga rabaa inuu Koongareeska siiyo warbixin faahfaahsan oo ku saabsan dadka fududeeya in dhaqaalaha Mareykanka loo weeciyo dhinacyo khaldan.
3. Xannibaadda Dal-ku-galka (Fiisaha)
Qodobka shanaad ee sharcigan ayaa faraya in loo diido fiisaha Mareykanka mas’uul kasta oo hadda xil haya ama horay u soo qabtay oo ku lug leh:
Musuqmaasuq baahsan oo la xiriira gargaarka Mareykanka.
Burburinta ama la wareegista xarumaha gargaarka bini’aadanimo ee Mareykanku maalgaliyay.
Fududeynta in gargaarka Mareykanku uu gaaro kooxaha argagixisada.
Xannibaaddan ayaa sidoo kale saamayn doonta xubnaha qoyska ee mas’uuliyiintaas, mana laga reebayo xitaa kuwa haysta fiisooyinka diblomaasiga (A-category) ama kuwa ururrada caalamiga ah (G-category).
4. Cunaqabataynta “Global Magnitsky”
Madaxweynaha Mareykanka ayaa loo fasaxayaa inuu cunaqabatayn dhinaca hantida iyo safarka ah ku soo rogo qof kasta oo shisheeye ah (foreign person) oo la shaqeeya dawladda Soomaaliya si loo leexiyo gargaarka loogu talagalay dadka tabaalaysan.
5. Barnaamijka Abaalmarinta Xogta
Ugu dambayn, sharcigu wuxuu amar ku bixinayaa in lacag abaalmarin ah oo gaaraysa ilaa $250,000 la siiyo cid kasta oo soo gudbisa xog horseedda in la aqoonsado mas’uuliyiin Soomaaliyeed oo ku lug leh ku shubashada barnaamijyada dawladda Mareykanka, ama xog horseedda in dib loo soo celiyo hanti laga xaday khasnadda Mareykanka.
Hindisahan ayaa hadda hor yaalla guddiyada Arrimaha Dibadda iyo Garsoorka ee Aqalka Wakiillada si ay uga doodaan ka hor intaan loo gudbin codeynta guud.