Waxaa Qoray Sacad Aw Magan
Barni waa filim drama ah oo soo bandhigaya sheeko qiiro leh oo ku saabsan gabar yar oo luntay. Waa mashruuc muuqaal-faneed muhiim u ah fanka Soomaaliyeed, isla markaana maalmo gudahood lagu soo bandhigi doono Red Sea International Film Festival, kaas oo ah mid ka mid ah dhacdooyinka ugu waa-weyn adduunka ee lagu qiimeeyo filimada.
Red Sea International Film Festival waa mid ka mid ah festifallada filimada ee ugu muhiimsan Bariga Dhexe iyo Waqooyiga Afrika (MENA). Waxaa sanad walba lagu qabtaa magaalada Jeddah – Sacuudi Carabiya, waxaana isugu yimaada filim-sameeyayaal, jilayaal, qorayaal, maalgeliyeyaal iyo warbaahin caalami ah.
Festivalkan wuxuu fursad dahabi ah u yahay filimada cusub si ay u helaan madal heer caalami ah, waxaana lagu bixiyaa abaalmarinta Yusr Awards oo lagu maamuuso filimada ugu wanaagsan.
Filimkan Soomaaliga ah oo soconaya 90 daqiiqo waxa uu ku qoran yahay af-Soomaali, waxaana lagu duubay dalka Jabuuti. Sheekadiisa oo ay hal-abuurteeda lahayd bulsho Soomaaliyeed ayaa u horseedaysa daawadayaasha dunida in ay galaan nolol miyiga Soomaaliyeed ka mid ah, oo ay ku luntay gabar yar
Sheekada Filimka
Barni waxay ka warramaysaa gabar sagaal jir ah oo si lama filaan ah uga luntay xaflad aroos oo ka dhacday tuulo yar oo Soomaaliyeed. Lumisteeda ayaa noqotay dhacdada dhaqaajisa sheekada, iyada oo walaasheed, Amina, oo 18 jir ah, ay si geesinimo leh u go’aansatay inay u dhaqaaqdo baadi-goob adag. Amina, oo ay wehliyaan saaxiibadeeda Xirsi iyo Geedi, waxay u safreen magaalada si ay u helaan gabadha yar.
Abuuraha & Soo-saarka
Filimka waxaa qoray Maxamad Sheekh, oo ah filim-sameeye Soomaaliyeed oo ku nool Maraykanka . Sheekadiisu waxay ka timaaday xusuus iyo bulsho uu yaqaan, taas oo filimka siisay dareen nadiif ah oo dabiici ah.
Waxaa soo saaray Abdirahman Fiili, halka shaqaalaha kale ee farsamada iyo jilayaasha intooda badan ay yihiin dad Soomaaliyeed oo u dhashay Jabuuti, arrin ka dhigaysa filimka iskudhaf qurux badan oo ka tarjumaya hal-abuurka Geeska Afrika.
Filimka waxaa la bilaabay in la duubo sanadkii 2023, waxaana goobaha lagu duubay qaybo badan oo kamid ah ay ku salaysan yihiin deegaan miyiga Jabuuti ah oo soo celinaya muuqaalada dhabta ah ee bulshada loo matalayo.
Ka Qaybgalka Red Sea International Film Festival
Bandhigga filimka ee Red Sea International Film Festival wuxuu u gogol xaarayaa in Barni uu gaaro dhagaystayaal aad u ballaaran. Festivalka Red Sea waa meel ay isugu yimaadaan filim-sameeyayaasha caalamka oo dhan, waxaana ku tartama filimo si heer sare ah loo soo agaasimay. Ka-qaybgalka Barni ee festivalkan wuxuu u iftiiminayaa sheeko Soomaaliyeed oo cusub, isla markaana abuuri doona fursad lagu aqoonsado hal-abuurka Soomaalida, taasoo kor u qaadaysa sawirka fanka Soomaaliyeed ee heer caalami. Filimku waxa matalaya jiil cusub oo hal-abuur Soomaaliyeed ah oo doonaya inay sheekooyinkooda gaarsiiyaan masraxyada caalamka,
Ka qaybgalka filimkan ee Red Sea International Film Festival wuxuu guul muhiim ah uyahay fanka Soomaaliyeed, wuxuuna caddeyn u yahay in hal-abuurka cusub ee Soomaalidu uu gaaray heer uu ku tartami karo caalam ahaan.
Barni wuxuu noqonayaa baaq ifaya oo ka imanaya dhallinyaro Soomaaliyeed oo doonaya in ay sheekooyinkooda dhabta ah gaarsiiyaan dunida oo dhan.