Dalalka ku yaalla Koonfurta Ameerika waxay muddo dheer muujiyeen taageero xooggan oo ay u hayaan qadiyadda Falastiin. Taageeradan waxay ku salaysan tahay dareen bani’aadamnimo iyo taariikh ay la wadaagaan shacabka la haysto, maadaama dalalkaasi iyaguna soo mareen gumeysi iyo faragelin shisheeye. Falastiin ayaa u muuqata astaan matalaysa halganka dadka dulmiga ku jira ee ka soo horjeeda awoodaha waaweyn.
Markii dagaalka Gaza uu xoogaystay, dalal badan oo Latin America ah ayaa qaaday mowqifyo adag. Madaxweynaha Colombia, Gustavo Petro, ayaa Shirweynihii Qaramada Midoobay ku sheegay in waxa ka socda Gaza yihiin xasuuq iyo dambi ka dhan ah bani’aadamnimada. Wuxuu ku baaqay in caalamku ka hortago ficillada Israel, isagoo ku tilmaamay Gaza goob lagu tijaabinayo awoodda ciidamada. Petro wuxuu tallaabo cad ku muujiyay mowqifkiisa, isagoo jaray xiriirka diblomaasiyadeed ee Colombia iyo Israel.
Sidoo kale, Madaxweynaha Chile, Gabriel Boric, oo dalkiisa uu yahay kan ugu dadka badan ee asal ahaan Falastiiniyiin ah, ayaa hadallo adag ka jeediyay shirarka caalamiga ah. Wuxuu weerarrada Israel ku tilmaamay arxan darro, wuxuuna ku baaqay in hoggaamiyeyaasha Israel, oo uu ku jiro Netanyahu, loo horkeeno Maxkamadda Caalamiga ah ee Caddaaladda (ICJ). Chile waxay sidoo kale ku biirtay dacwadda ay South Africa ka gudbisay Israel, taasoo ku eedaysay inay ku kacday xasuuq.
Sababaha Taageerada Latin America ee Falastiin
Dalalka Latin America waxay taageerada xooggan ee ay u muujiyaan Falastiin ku saleynayaan dhowr sababood muhiim ah. Marka hore, dalalkan oo soo maray gumeysi iyo faragelin shisheeye waxay si fiican u fahmaan dhibaatada shacabka la haysto. Falastiin waxay u muuqataa sidii qayb ka mid ah taariikhdooda, taasoo ku dhiirrigelisa inay u arkaan taageerada Falastiin waajib taariikhi ah oo ku dhisan cadaalad iyo halgan ka dhan ah dulmi.
Sidoo kale, bulshooyin badan oo Falastiiniyiin ah ayaa ku nool Latin America, gaar ahaan Chile oo keliya ay ku nool yihiin boqolaal kun oo qof. Bulshooyinkan waxay saameyn muuqata ku yeeshaan siyaasadda gudaha, iyagoo abuura taageero ballaaran oo ka imaanaysa shacabka iyo dowladda, taasoo ka dhigaysa arrinta Falastiin mid si dhow loola socdo.
Dhanka kale, dalalkan badankood waxay leeyihiin xorriyad siyaasadeed, maadaama aysan si toos ah ugu tiirsanayn Mareykanka ama Midowga Yurub dhanka milatari ama dhaqaale marka laga reebo ganacsiga guud. Tani waxay u oggolaanaysaa inay qaataan mowqifyo madax-bannaan oo aysan ka cabsanayn cadaadis caalami ah. Tusaale ahaan, markii Colombia ay xiriirka u jartay Israel, cadaadis dhaqaale oo culus lama saarin, taasoo muujinaysa heerka madax-bannaanidooda.
Gunaanad
Dalalka Koonfurta Ameerika waxay noqdeen taageerayaasha ugu muuqda ee qadiyadda Falastiin, iyagoo hadal iyo ficil ku muujinaya mowqifyadooda. Madaxda dalalka waxay cambaareeyaan ficillada Israel, waxayna qaadaan tallaabooyin rasmi ah sida xiriir jaris iyo dacwooyin caalami ah. Taageeradan waxay ku dhisan tahay taariikh, bani’aadamnimo, iyo rabitaan ay ku muujiyaan madax-bannaanidooda siyaasadeed, taasoo ka duwan dalalka Carabta qaarkood oo laga waayay taageero noocan oo kale ah, isla markaana xiriir toos ah la leh Israel sida Imaaraadka, Masar, Urdun iyo Moroko.