Dowladda Mareykanka ayaa si rasmi ah u joojisay mashruuc muhiim ah oo lagu taageeri jiray Xarunta Warbixinta Maaliyadda Soomaaliya (Somalia Financial Reporting Center – FRC).Sida ku cad qoraal rasmi ah oo laga soo diray Wasaaradda Arrimaha Dibadda ee Mareykanka, go’aankan ayaa dhaqan-galay laga bilaabo 30-kii Janaayo, 2026.
Qoraalka ayaa lagu amray in si degdeg ah loo joojiyo dhammaan kharashyadii ku bixi jiray maalgelinta mashruucan, sidoo kale la baabiiyo ballan-qaadyadii maaliyadeed ee aan weli la fulin.
Saamaynta Go’aankan
Xarunta FRC ayaa ah hay’adda qaranka Soomaaliya ee u xilsaaran la-dagaallanka lacagta la dhaqo (Money Laundering) iyo ka-hortagga maalgelinta argagixisada. Joojinta taageeradan ayaa loo arkaa dhabar-jab weyn oo ku yimid dadaalladii lagu kormeerayay hufnaanta nidaamka maaliyadeed ee Soomaaliya, xilli uu Mareykanku horey u dhimay barnaamijyo dhowr ah oo uu ka taageeri jiray dalka.
Weli ma jiro wax war ah oo ka soo baxay dowladda Federaalka Soomaaliya oo ku aaddan saamaynta ay tallaabadan ku yeelan karto shaqada hay’adda FRC iyo xiriirka iskaashi ee labada dal.