Wafdi ka socda Nigeria oo booqday Baarlamaanka Kenya si ay waayo-aragnimo uga kororsadaan dagaalka ka dhanka ah musuqmaasuqa
Wafdi heer sare ah oo ka socda dalka Nigeria ayaa booqasho rasmi ah ku tagay magaalada Nairobi, gaar ahaan xarunta Baarlamaanka dalka Kenya. Wafdigan oo ka kooban xildhibaanno iyo saraakiil ka tirsan hay’adaha la-dagaallanka musuqmaasuqa ee Nigeria ayaa socdaalkooda ku sheegay in uu yahay mid kor loogu qaadayo is-dhaafsiga aqoonta, waayo-aragnimada iyo hab-raacyada sharci ee la xiriira la-dagaallanka musuqmaasuqa.
Intii ay joogeen Kenya, wafdiga waxa si diirran u soo dhoweeyay xubno ka tirsan Baarlamaanka Kenya iyo masuuliyiin kale oo dowladda ka tirsan. Labada dhinac ayaa yeeshay wadahadallo miro-dhal ah oo lagaga hadlayay hababka isla-xisaabtanka ee loo adeegsado la-dagaallanka musuqmaasuqa, hufnaanta hay’adaha dowladda, iyo korjoogteynta dhaqaalaha.
Wafdiga Nigeria ayaa si gaar ah u muujiyay xiisaha ay u qabaan qaab-dhismeedka sharciyeed iyo hay’adaha madax-bannaan ee Kenya u xilsaaran ilaalinta hufnaanta iyo daahfurnaanta dowladnimada. Waxa ay sheegeen in ay doonayaan in ay qaataan casharro ay dalkooda ka hirgelin karaan si wax looga qabto musuqmaasuqa baahsan ee ay wajahayaan.
Socdaalkan ayaa qeyb ka ah dadaalka is-kaashi ee u dhexeeya waddamada Afrika si loo dhiso dowladnimo hufan oo isla-xisaabtan leh.