Itoobiya oo weli raadinaysa marin badeed, Taliyaha Ciidanka oo su’aal ka keenay xaaladda xeeb la’aanta Itoobiya.
Itoobiya oo muddo dheer ahayd dal xeeb la’aan ah ayaa mar kale muujisay sida ay ugu hanqal taagayso helitaanka marin badeed, iyadoo hoggaankeeda milatari uu si adag u muujiyay dareenka ay ka qabaan xaaladdan.
Field Marshal Birhanu Jula, Taliyaha Guud ee Ciidanka Difaaca Qaranka Itoobiya, ayaa sheegay in aysan cadaalad ahayn in ummad tiradeedu sii kordhayso aysan lahayn marin biyood ay si xor ah ugu tiirsanaan karto.
Isagoo ka hadlayay munaasabadda maalinta 118-aad ee Ciidanka Difaaca Itoobiya oo lagu qabtay Dugsiga Tababarka Ciidanka Badda ee dalka, Field Marshal Birhanu wuxuu yiri:
“Dadkayagu hadda waa 130 milyan, waxaana la filayaa in ay gaaraan 200 milyan 25 sano gudahood. Sidee baa danaha 200 milyan qof loogu hor istaagi karaa laba milyan oo keliya dartood? Taasi ma aha mid caddaalad ah, mana waafaqsana sharciga caalamiga ah.”
Taliyaha ayaa ku eedeeyay cadawyo taariikhi ah in ay Itoobiya ka xannibeen marin badeed, isaga oo qirtay in ay jireen khaladaad gudaha ah oo qayb ka ahaa xaaladda hadda jirta. Wuxuu sheegay in Itoobiya ay go’aansatay in ay xoojiso awooddeeda difaaca, dardargeliso horumarka gudaha, isla markaana ay dadaal kasta u gasho sidii ay dalka ugu heli lahayd marin badeed rasmi ah oo joogto ah.